22/9/2008 TOUCH FC X 四海流浪 ﹝資料來源：東Touch﹞

20才之新一代

歌仔都有得唱：「齊心就事成」，經常說青訓才是現今香港足球最需要的東西，其實除了要有好的青訓外，參予的球員都要有團結的心，因為今時今日的香港，沒有一套完備的青訓計劃，往往令小朋友覺得踢足球從來都是玩票性質，足球只是個人的玩樂，或者用來打發時間罷了，沒有團結的精神，令香港足球一直處於低處。不過這兩季，大家好像找到了新方向，這兩季甲組球隊的組成，很多都是由區隊演變出來的，融合了青訓和團結，這個應該是未來香港足球的大趨勢。今次訪問的球隊「四海流浪」，他們真的比較有heart，因為他們為的不是爭標，而是只想好好培育下一代足球員，筆者要說的並不是要歌頌他們的情操如何高尚，而是想帶出這個模式正正是香港足球現時最需要的東西。上屆由於成績不太理想，今年原本需要降落乙組作賽，但球隊命不該絕，得到外來支持，今季以四海名義再逐鹿中原，但心態有點不同，不再是以爭標行先，為的只是想給陣中的年輕人多點機會，而且要每一個球員都團結，少埋怨、多鼓勵，就算大家來自不同地方的人，但「四海」之內，皆兄弟也！

繼續流浪

四海的前身其實是流浪，由於上季成績未如理想，原本要落到乙組作戰，但幸好得到新老闆的支持，今季冠名四海，才能夠再在甲組奮鬥。球會總監李輝立表示：「自己就教了波十幾年，由93年開始帶住流浪踢上甲組，轉眼間就16個球季，不過好可惜上屆因為成績差，今年要被降落乙組，原本我自己都對足球有些少厭倦，諗住球隊成績又唔好，加上香港球圈又好似冇咩起色，打算唔再搞波。但又估唔到，當我以為就係咁的時候，我地的副會長蔡連鴻搵到而家的老闆朱明先生，佢願意支持我地球會，再加上用了四海的名義申請一個新的會籍，咁我地今年就可以繼續留在甲組。今季我地主要用返球會一直培訓緊的幼苗，其實我地呢十幾年大部分培育出來，有潛質、成材的，到最後都賣了給南華，或者傑志等等，流浪的模式就係主力培訓香港新人，而可能就係因為有老闆睇中我地呢點，認同我地，所以決定俾錢支持。須知道搞足球其實係一個『高消費』的活動，所以好希望大家可以俾點時間我地，證明呢班球員係得！」在上兩周，四海的第一場甲組球賽，就以2：0擊敗愉園，相信一眾老闆都應該收貨。

幼苗成長了

四海現時的華人球員都是17至20歲的青年球員，活力和可塑性甚高，這班欠缺實戰經驗的年輕一代，對四海而言，的確是明日棟樑，不過想令到這一班球員成為下一代香港足球的重心，相信還有一段時間需要投資，始終要搞好一隊球員是需要耐性，用大概兩至三年的時間令整隊球隊都上了軌道，才有能力爭標。球會總監認為：「其實今時今日係我地球會裡面，係最好個班香港青年軍，真係希望未來可以再培訓到另一班好的球員，延續香港足球。我個人認為好的外援可以引進好多新的技術同思維俾我地，令香港球員進步更加快，不過經驗話俾我地聽好的外援球員真係好難搵，因為香港的地理環境、練波場地，住宿，各樣野的配合，就算你有錢，佢地都未必會來踢，所以優質的外援球員真係好難搵。」想到要找外援，對於一般的球隊來說，的確是件平常事，但對於四海來說，好的外援除了增強實力外，還有另外一個用途，「今年我地已經搵左有十幾個外援，來自有不同的國家，剛果、尼日尼亞、巴西、喀麥隆等等，希望在季前選出最好9個，因為今季每場可以派6個外援上場，同時亦希望呢一班優質的外援可以帶起呢班新秀，因為有潛質的球員我地都已經搵哂，欠缺的就只係時間同經驗。」以外援帶新人，相信這也是幾年最大膽的一個嘗試吧！

薪火相傳

其實除了找外援到來幫手外，球隊也知道這班年輕球員最需是一個「香港老花鏡」，把自己的經驗分享，最好當然是可以當場踢埋，李輝立也有這個想法：「我地現時球隊有6個年紀大概20歲到的年輕球員，佢地本身已經係東亞代表隊的成員，佢地會代表香港出戰明年的東亞運動會，質素上都唔成問題，而我地都相信呢一班的年輕球員會係未來呢幾年，承接到香港球壇，咁當然係有賴好的練習、外援同教練。需知道要凝聚一班小朋友係呢度踢波，其實係要花好多心思，一來要顧住佢地的學業啦，因為佢地好多仲好細，我地當然希望佢地學業同足球都兼顧到，二來就係佢地的品行啦，我地都唔希望見到佢地行差踏錯，所以今年我地特別有來自紀律部隊的張匯先生幫手，令到成隊球隊的運作上更加有紀律。至於球場上面的實戰，唔使講就一定靠譚兆偉同潘文俊啦，以佢地在甲組的經驗同埋踏入做教練的年紀，對我地一班小朋友會有好好的影響。希望佢地能夠將自己過往的經驗話俾我地班小朋友聽，對班小朋友而言，的確有好大幫助。」

至於譚兆偉就認為：「其實過往自己都有同年輕球員一齊比賽，但現時最大不同係呢一班小朋友年紀比起以前更加再細一點！例如以前傑志那一班個個24至26歲，剛剛開始當打，而流浪呢一班更年輕，就要多點時間去磨練，希望可以將自己的經驗過哂俾佢地，因為佢地先至係未來的棟樑！不過你問到我有咩特別教法，其實就真係冇乜，因為我自己本人就鍾意任由小朋友去試下，事關有好多人都會在教波的同時將自己投射埋入球場入面，一味叫球員唔好咁踢咁踢，要咁踢咁踢，會令到球員冇咩進步，我覺得應該先俾個自由度佢地自己去做，由佢地發揮，到真係錯，就吹停佢地，逐一講俾佢地知點解錯、錯係邊，以後應該點。踢波係用個腦踢，唔係一味亂黎，要一面教佢地法則，一面要訓練佢地勇於去試去發揮，呢樣野我覺得好緊要。」

如何融合？

據了解，來季四海的比賽重心將會依重今年大概20歲那一班代表東亞運動會的年輕球員，他們為數有6人，再加上外援，希望互補不足，同時令年輕球員成長得更快，但外援加年輕球員如何融合？教練張匯就表示：「最開頭的時候就要解決大家言語不通問題，之後就係要外援明白自己的角色同埋大家要用個咩態度相處。」譚兆偉就認為：「希望唔好用鬧的形式，會比較用提點的角色，因為而家的小朋友真係唔鬧得，你愈鬧佢，佢愈驚或者冇信心，所以要用一個唔同的方法。例如有人失波，唔好淨係識得埋怨，應該就算失波，要一齊追番，要咁樣教佢地，咁樣大家至會團結！」19歲的門將梁興傑說：「起初同班外援係完全溝通唔到，又唔知佢想點，真係有點難相處，但係好在大家都冇乜野，而家慢慢開始熟落點，不過都仲需要點時間磨合。」以外援帶領年輕球員對於其他球隊來說可能是天方夜譚，因為外援未至於要這樣「援」吧！但事情就是這樣。

後記：

話說筆者其實曾經也是流浪的一份子，大概是10年前的事了，那時的青訓比現在更加沒有計劃，因為體院解散了，大家都是東練練，西踢踢，但當時的流浪都堅持要有青訓，記得車馬費一個月只有$400，金額不是重點，重點是他們肯定了我是球隊的一員，而且以當時的物價，作為初中的學生來說，那$400有如禮物一般，但可惜最後筆者還是投入社會所謂的正道，不過今天重遇上，也許是一份緣分吧，看到現時的新一代球員有一個較好的培訓環境，而且據聞他們現時的月薪都有一萬左右，心裡其實很感動，因為他們可以專心操練，不用為金錢而煩惱，但無論如何，希望這班「後生」努力，最重要是團結，因為今時今日有緣做兄弟般的隊友，實是難能可貴，還望各位珍而重之，加油！